Upphaf

Þú ert stödd/staddur í litlum kaupstað í Vestur- Noregi árið 888. Þú ert á flótta undan Haraldi sköllótta, sem er búinn að sölsa undir sig völdin í Noregi. Faðir þinn var ríkur höfðingi, sem barðist gegn Haraldi. Haraldur sigraði föður þinn og brenndi bú ykkar, drap báða foreldra þína og sór að útrýma allri ykkar ætt. Þú hefur falið þig allan veturinn hjá gamalli völvu í skóginum. Hún kenndi þér forn fræði og spáði fyrir þér. Eina nótt um vorjafndægur sat hún við eldinn og reyndi að sjá, hvað nornirnar höfðu spunnið handa þér. Þá rak hún skyndilega upp óp, féll froðufellandi á gólfið og engdist sundur og saman. Þegar hún rankaði við sér, starði hún á þig stórum augum og tautaði eitthvað óskiljanlegt fyrir munni sér. Þú spurðir, hvað hún hefði séð. Hún mælti: -Eigi veit ek, hvárt þér fylgir hamingja eður óhamingja, en hvár sem er, þá er hún meiri en annarra manna. Far þú at vári til Sætúna ok freistaðu gæfunnar.
Og nú ert þú við höfnina í Sætúni, dulbúin(n) sem flakkari, en með a. m. k. 100 merkur silfurs í beltinu. Þetta hafðir þú tekið með þér nóttina sem þú flúðir úr logandi föðurhúsum. Þú gengur inn á öldurhús og kaupir krús af öli, brauð og ost. Þar eru margir menn að hlusta á ferðalang, sem segir sögu sína.
Þú sest þar hjá og hlustar á sögumann.
Þú sest þar hjá og gefur engan gaum að sögumanni.

Þú hlustar á sögumann

Sögumaður er nýkominn frá Eldlandi. Hann er að lýsa landinu og ævintýrum sínum þar. -Ég veit, að þið trúið því ekki, en á Eldlandi eru til heitar lindir, þar sem sjóðandi heitt vatn rennur upp beint úr jörðinni. Stundum sprautast það margar mannhæðir í loft upp, og í nokkrum lindum er blár leir, sem sýður eins og grautur.
Þú sérð, að flestir áheyrendur hrista höfuð sín eða hlæja. Enginn virðist trúa þessu.
-Ég hitti þar líka mann, sem sagði að jörðin hefði eitt sinn skolfið ógurlega. Síðan hafði eitt fjallið opnast og spúið eldi og eimyrju í hálft ár. Hann sagði, að það hlyti að vera risastór dreki eða einhver annar óvættur í fjallinu, en hann sá það aldrei með eigin augum.
Nú skella flestir áheyrendur upp úr. En sögumaður heldur ótrauður áfram. - Það búa örfáir á þessu landi. Á nokkrum stöðum hafa menn numið land, en mest allt landið er enn þá ónumið. Það er viði vaxið milli fjalls og fjöru, þar er mjög góð fuglaveiði, þar er hægt að rækta hafra, beitilöndin eru endalaus og árnar eru fullar af fiski.
-En það er ekki hægt að leita fjár og frama í óbyggðu landi, andmælir einn gestanna. Þess þarf að leita í suðurveg.
Segðu það ekki, segir ferðalangurinn. Ég hef heyrt, að mesta gersemi heims sé falin á Eldlandi. Þar er stór dalur, sem sagður er vera hóffar Sleipnis, hests Óðins. Einhvers staðar á yfirreið sinni um Eldland týndi Óðinn hring sínum, Draupni, sem gefur af sér níu aðra gullhringa níundu hverja nótt.
Nú er áheyrendum nóg boðið. Þeir snúa sér frá sögumanni og sumir fara. Eftir situr sögumaður og hristir höfuðið. Þú getur nú valið að tala meira við sögumann eða fara að sofa.

Þú gefur engan gaum að sögumanni

Þú sest út í horn og reynir að láta lítið á þér bera. Þú tekur ekki eftir því, að veitingamaðurinn horfir á þig grunsemdaraugum. Eftir stutta stund bregður hann sér frá. Þegar hann kemur aftur, virðist hann vera mjög taugaóstyrkur. Hann heldur áfram að vinna við mat og ílát, en lítur við og við út um gluggann. Allt í einu heyrist mikið vopnabrak og þú sérð að menn Haraldar sköllótta umkringja öldurhúsið. Síðan ryðjast fjórir þeirra inn og ganga beint að þér.
Samanlögð bardagahæfni þeirra er 30 stig. Þú verður að berjast. Ef svo ólíklega vill til, að þú sigrir, getur þú reynt að hlaupa niður á bryggju og komast á skip, en þú hefur þá engan útbúnað með þér.

Ef þú tapar, þá..............

Þú talar meira við sögumann

Þú sest hjá sögumanni og spyrð hann spjörunum úr um Eldland. Hann heitir Gestur. Hann segir að hann ætli sjálfur aftur til Eldlands eftir nokkra daga. -Ég þekki stýrimann, sem ræður yfir skipi. Hann ætlar að sigla til Eldlands að tveimur dögum liðnum. Hann vantar menn og farm og þú getur sennilega fengið að flytja ýmsan varning með honum ef þú hjálpar til við róðurinn. En ef þú vilt búa þig betur undir förina og átt eitthvað af peningum, getum við tveir keypt skip í félagi og farið á eigin skipi til Eldlands. Þá höfum við líka nógan tíma til að undirbúa ferðina.

Þú segist ætla að ákveða þig að morgni. Síðan ferð þú að sofa. Um nóttina dreymir þig dreka, sem liggur á stórum haugi af gullhringum. Einn hringanna er öllu mestur, og þú sérð að af honum drjúpa aðrir gullhringar. Þú teygir þig fram til að ná í hann, en þá læsist kjaftur drekans um þig. Þú vaknar, og sól skín á lofti. Þú þarft að ákveða þig.

Þú ákveður að fara með næsta skipi til Eldlands.

Þú klæðir þig og gengur niður að höfn, ákveðin(n) að finna skipið, sem Gestur sagði þér frá. Gatan er mjög óhrein og rottur og svín hlaupa um allt. Á leiðinni ferð þú fram hjá litlu timburhúsi. Þar er skilti fyrir ofan dyrnar og á því stendur skilti, þar sem orðið VOPN er ristað með rúnum.
Vilt þú fara inn í búðina? Eða vilt þú fara beint niður að höfninni.

Þú ferð inn í búðina.

Þú ferð inn í búðina. Hurðin er gömul og það brakar í henni þegar þú ferð inn. Inni í hálfrökkrinu situr gamall maður, sem einbeitir sér við að brýna mjög fallegt sverð. Það glampar á það þegar dagsbirtan að utan kemur inn um dyrnar. Manninum bregður og hann stingur sverðinu snöggt í slíðrið. -Hvað vilt þú, segir hann með titrandi röddu og gengur hægt aftur á bak upp að vegg.
Þú segist vera þar til að kaupa vopn og að þú viljir honum ekkert illt. Þá gefur hann frá sér feginsandvarp og spyr, hvaða vopnum þú hafir helst áhuga á. Hér getur þú keypt öll vopn sem þig vantar. Þau kosta jafn margar merkur silfurs og þau vega í vættum. (Sjá Vopn og bardagar) Hér er líka til 20 faðmar af reipi, fiskinet, 100 önglar og sólarsteinar. Hvert um sig kostar eina mörk silfurs. Þegar þú ert að velja þér vopn, spyr maðurinn hvert þú sért að fara. Þegar þú segist vera á leiðinni til Eldlands, rekur hann upp óp og segir: Það er margt illt á Eldlandi. Drekar, tröll og aðrar óvættir leynast undir hverjum steini. Þegar þú segist samt ætla að fara þangað, segir hann:
 
 
 
-Ef þú vilt fara til Eldlands, þarft þú á góðu sverði að halda. Hann dregur upp sverðið, sem hann var að brýna. Þegar hann dregur það úr slíðrum, fer það að loga eins og sólin sjálf. Þú verður að halda hönd fyrir augun. Maðurinn slíðrar þá aftur sverðið. 
Síðan segir hann: -Þetta sverð átti faðir minn og faðir hans á undan honum. Ég átti að gefa syni mínum þetta töfrasverð, en ég á engin börn. Því gef ég þér það. Örlögin hafa sent þig hingað einmitt á þessari stundu.Sverðið eykur bardagahæfni þína um 20 stig. Þegar þú heldur því yfir höfði þér, lýsir það upp umhverfið og blindar alla, sem á það líta. Maðurinn gefur þér sverðið og þú þakkar honum fyrir gjöfina og kveður hann með virktum.

 Þú gengur niður að höfn. Það er markaður við höfnina. Fjöldi fólks gengur á milli söluborðanna. Veðrið er hlýtt og léttur blær andar úr vesturátt. Í einu horni markaðstorgsins eru ferhyrndar girðingar. Þar eru seldir hestar, kýr, kindur, geitur, hæns, hundar, svín og þrælar. Í höfninni eru tíu skip og meir en tuttugu litlir fiskibátar eru bundnir við gamla bryggju, sem viðist geta hrunið við minnsta árekstur.

Vilt þú fara á markaðinn? Eða vilt þú fara beint niður að höfninni.

Þú ferð á markaðinn.

Á markaðnum er sterk lykt. Hún kemur frá gömlum sjómanni, sem er að selja fisk. Hann er að tala við annan sjómann, og þú getur ekki annað en heyrt, hvað þeir segja. - Nú er hann Gráskeggur gamli alveg að ganga af göflunum, segir fisksalinn.
-Já, það eru margir, sem flýja úr klóm Haraldar sköllótta til annarra landa. En að fara til Eldlands er að fara úr öskunni í Eldinn.
-Hann ætlaði víst að fara á morgun, en hann vantar enn þá menn, og fáir eru þeir sem dirfast að sigla til Eldlands. Hann verður að bíða í marga mánuði eftir mannskap, eða gefast upp ella. Báðir reka upp skellihlátur.
Þessi Gráskeggur, sem þeir töluðu um, hlýtur að vera stýrimaðurinn, sem Gestur sagði frá. Vilt þú spyrja sjómanninn um Gráskegg eða athuga markaðinn betur, eða fara beint niður að höfninni.

Þú ferð beint niður að höfn

og gengur út á bryggjuna. Þú sérð nokkra litla fiskibáta sigla út og sjómenn, sem eru að bera fullhlaðna kassa af fiski að markaðnum. Við bryggjuna eru líka 10 stór víkingaskip. Á einu þeirra stendur maður með sítt, fléttað grátt skegg. Sorgmæddur á svip hallar hann sér að borðstokknum. Skip hans er gamalt og seglið slitið.
Vilt þú spyrja hann um far til Eldlands
eða athuga markaðinn betur?

Þú spyrð sjómanninn um Gráskegg.

Þá verður hann strax fúll á svip og mælir: - Eigi veit ek, hvaða erindi þú átt við Gráskegg, en hann á ljótasta skipið við bryggjuna og hann er með sítt, grátt skegg. Ef þú ferð niður á bryggju, finnur þú hann örugglega.
Vilt þú athuga markaðinn betur, eða fara beint niður að höfninni?

Þú athugar markaðinn betur.

Það er furðulegt, hve margt er selt þar. Þrælar, húsdýr, vopn, klæði, timbur, korn, öl, brauð og silfurmunir.
Ert þú stúlka eða piltur? Framhaldið ræðst af því!

Þú ferð að sofa.

Þú leigir herbergi hjá veitingamanninum, ferð upp og leggst í rúmið. En þú getur ekki sofnað. Þú liggur andvaka og hugsar um Eldland. Allt í einu heyrir þú undarlegt gól úti í horni. Það er ömurlegt og örvæntingarfullt, og það er eins og það komi úr öðrum heimi. Þér finnst eins og það seiði þig til sín og hræði þig frá sér samtímis. Í dauðans skelfingu ríst þú upp og spyrð: -Hver er þar?
Þá sérðu bláa gufu, sem sfnast saman í horninu og tekur á sig mannsmynd. Þetta líkist þó engum manni, heldur beinagrind, sem er þakin undarlegri, lýsandi, blárri gufu. Veran talar til þín djúpri, titrandi röddu: - KOM.... KOOOOOM.......... KOOOOOOOOOM....
Þetta er draugur (bardagahæfni 1000). Ef þú ert goði, völva, seiðkona eða munkur getur þú sloppið auðveldlega. Ef ekki, verður þú að berjast við drauginn!

Þú verður að berjast við drauginn!

Því miður hefur þú ekkert samband við æðri máttarvöld. Í hvert sinn sem þú reynir að ná taki á draugnum, grípa hendur þínar í blauta, kalda slepju, og þú nærð engu taki á honum. Ef þú reynir að höggva til draugsins með hnífnum þínum, skerst hnífurinn viðstöðulaust gegnum bláa gufu. Þú finnur að þú missir máttinn. Nú ráða örlög þín og bardagahæfni úslitum. Ef þú hefur minna en 6 stig í gæfu og kunnáttu samanlagt, tapar þú. Ef þú hefur sex stig eða meira í gæfu og kunnáttu samanlagt, getur þú talað við drauginn.

Þú veist

að þú mátt ekki sýna neina hræðslu, þá nær draugurinn valdi á þér. Þú horfir fast á drauginn og spyrð: -Hver ert þú?
Draugurinn keður þessa vísu:
 
Nár em ek í Niflheimi
nefnisk Geirröður
á í holu
hring góðan
sá varð minn bani
í beði þínum
því vil ek blóð
bergja lifenda.

Þú skilur, að draugurinn er andi manns, sem hefur hefur búið í þessu herbergi. Hann hefur átt dýran hring og einhver hefur drepið hann til að fá hringinn. En hringurinn er falinn í holu.
Þú stekkur að draugnum og grípur beinið, sem er í miðri gufunni. Þá hverfur draugurinn og þú ferð með beinið út og grefur það í jörð. Draugurinn hefur nú fengið frið. þú ferð aftur inn og leitar í horninu, þar sem draugurinn birtist. Þar finnur þú holu, og í henni er gullhringur, sem er að minnsta kosti 100 marka virði. Bættu þessari upphæð við sjóð þinn. Þú ferð að sofa og vaknar aftur hress að morgni. Þú ákveður að fara niður að höfn.

Þú ákallar æðri máttarvöld

og særir drauginn aftur til Heljar. Þú ferð að sofa og vaknar aftur hress að morgni. Þú ákveður að fara niður að höfn.

Þú kaupir skip í félagi við Gest.

Nokkrar vikur líða, og þú kaupir skip í félagi við Gest. Á meðan þú bíður í Sætúnum býrð þú í öldurhúsinu. Eina nóttina dreymir þig, að völvan sem þú bjóst hjá, segi við þig, að þú verðir að flýja, helst til annarra landa. Þú getur valið að
fylgja ráðum hennar,
fela þig hjá bónda, sem þú þekkir,
bíða rólega í Sætúnum eftir skipi, eða
fela þig í skipi, sem er að leggja úr höfn.

Þú kaupir eigið skip.

Þú hugsar þér, að draumurinn geti þýtt bæði frama og auðlegð, en líka hættur. Þú ákveður samt að kaupa eigið skip og ferð á öldurhúsið. Þar hittir þú víking, sem er nýkominn úr ævintýraríkri siglingu. Hann er reiðubúinn að selja þér skip sitt og kveðst vera búinn að fá nóg af sjómennsku og ævintýrum um sinn. Þið farið saman niður að höfninni. Þar liggur skip hans við festar og þið farið um borð. Hann spyr, hvert þú hafir hugsað þér að sigla og þú svarar, að þig langi til að freista gæfunnar á Eldlandi. Honum bregður nokkuð og honum þykir þú djörf/djarfur. Hann segist hafa átt vin, sem missti lífið í ferð til Eldlands. En hann óskar þér samt góðrar ferðar. Það verður úr, að þú kaupir skipið af honum fyrir 100 merkur silfurs. (Ef þú átt ekki 100 merkur, verður þú að skulda honum afganginn. En þá á hann helminginn af öllu, sem þú kemur með aftur úr Eldlandsferðinni.
Ánægð(ur) með kaupin, en hugsi, gengur þú frá höfninni. Skyndilega kemur maður á móti þér og ávarpar þig. Hann kveðst hafa heyrt samtal þitt við víkinginn á öldurhúsinu um að kaupa skip. Hann segist þekkja menn, sem vilja fá skiprúm. Maðurinn er frekar ógeðfelldur og það leggur illan daun af honum. Þú ákveður samt að fylgja honum á fund mannanna, til að sjá, hvort þér líst á skipshöfnina.
En þegar þið komið inn í þröngt húsasund, koma skyndilega fram þrír aðrir menn og ráðast að þér til að ræna þig. Þú veitir öfluga mótspyrnu, en þú átt við ofurefli að etja. Þá birtast allt í einu 3 aðrir menn, sem sjá ræningjana ráðast á þig. Þeir draga upp vopn sín og koma þér til hjálpar. Hinir gera þá gagnárás. Það er barist upp á líf og dauða.

Ræningjarnir hafa samanlagt 180 stig af bardagahæfni. Hjálparmenn þínir hafa 120 stig og þín eigin stig bætast við. Örlögin ráða, hvort þið sigrið eða tapið.

Þú gengur niður að höfn.

Þar sérð þú tíu víkingaskip liggja við bryggju. Margir fiskibátar sigla út og inn um hafnarkjaftinn. Þú gengur að glæsilegasta víkingaskipinu og skoðar það betur. Það kemur kunnuglega fyrir sjónir. Allt í einu gengur maður fram til þín og heilsar þér kunnuglega. Þá þekkir þú hann. Þar er kominn Úlfur Skarði, fóstbróðir föður þíns. Skipið er víkingaskip föður þíns, sem Úlfur hefur fengið að láni í tvö ár til að herja í vesturveg.

Þú segir Úlfi alla söguna um fall foreldra þinna og yfirgang Haraldar sköllótta. Þegar hann hefur heyrt sögu þína, verður hann þungbúinn á svip. Svo segir hann hægt og festulega: -Ég var fóstbróðir föður þíns og það er nú skylda mín að hefna hans og drepa Harald sköllótta sjálfan eða einhvern af ættmönnum hans, þó að það kosti mig lífið. En skip þetta er föðurarfur þinn og þú mátt gera við það hvað sem þú vilt. Ég ræð þér til að sigla því til Eldlands og leita gæfunnar þar. Áhöfnin er fús til að fylgja þér. Komdu aftur eftir nokkur ár og leitaðu hefnda á Haraldi, ef hann lifir þá enn.
 
Þú kveður Úlf og hann leggur byrðar á bak sér og fer á markaðinn að kaupa sér hest. Þú ferð sjálf(ur) á markaðinn og kaupir nauðsynjar og hleður þeim á skipið. Síðan segir þú áhöfninni að róa út úr höfninni og setja upp segl.

Þið sigrið.

Móður eftir viðureignina þakkar þú mönnunum hjálpina og spyrð eftir nöfnum þeirra. Þeir segjast heita Dagur, Bárður, Vopni, Þorleifur og Brandur. Þér geðjast vel að mönnunum, sem eru sterklegir. Þú segir þeim frá fyrirætlunum þínum og spyrð, hvort þeir séu reiðubúnir að fylgja þér til Eldlands. Eftir nokkrar umræður samþykkja þeir boð þitt, sem er; -að þú fáir fjórðung af þeim sjóðum sem þið kunnið að finna, en þeir skipti þremur fjórðuhlutum á milli sín. Þú ert ánægð(ur) með að hafa fengið þá félaga með þér og byrjar að skipuleggja þau innkaup, sem þarf að gera.
Þegar þú hefur keypt nauðsynjar, gangið þið niður að höfninni, þar sem skipið þitt liggur. Þegar þið nálgist hafnarbakkann sjáið þið 4 af mönnum Haraldar sköllótta, og þeir standa vörð við skipið. Þið spyrjið eldri konu, sem er að selja ávexti, hvort hún viti hvað hefur gerst. Konan segir, að það hafi komið 20 manna lið og rannsakað skipið, en ekki tekið neitt með sér. Þeir hurfu síðan á brott, en skildu eftir 4 manns.

Þið eigið nú þá kosti að leggja til atlögu við óvinina
eða finna annað skip.

Þú spyrð Gráskegg um far til Eldlands.

Hann virðist gamall og slitinn, en furðu greindarlegur. Hann hefur síðan hött á höfði og bót fyrir öðru auganu. Hann býður þig velkomna(inn) um borð. Næsta morgun setjið þið upp segl.

Þú gengur um á markaðnum.

Þar eru kaupmenn frá allri heimskringlunni sem bjóða út vörur sínar. Hér er allt sem þig hefur dreymt um. Þarna er líka stórt litofið sölutjald. Í því stendur arabískur kaupmaður frá Cordóva. Hann selur litofin klæði og persnesk teppi frá Austurlöndum, silki og postulínsvasa frá Kína, gullmuni og fílabein frá Afríku, krydd, lyf og ilmefni frá Indlandi og Austurlöndum nær og vopn og herklæði frá Tóledó og Damaskus. Fyrir sveitastúlku frá Noregi er þetta eins og draumur. Þú ferð að máta silkikjóla, sem sjálf Sheherazade hefði getað borið með sóma. Arabinn talar við þig á blendingi af engilsaxnesku, völsku og danskri tungu, sem hann hefur lært á ferðum sínum. - Lyktar gott, snuff snuff, segir hann og heldur fram lítilli skrautlegri flösku. - Er ilmvatn. Frá Egypt. Nota Kleópatra sjálf! Prófa prófa! Ódýrt ódýrt!
Þú þefar af ilmvatninu. Lyktin er yndisleg og þér finnst eins og þú sért í höll kalífans. Þú tekur ekki eftir því, að þú fellur niður á persneskt teppi og sofnar.

Næsta dag vaknar þú með ægilegan höfuðverk. Þú lítur í kring um þig og sérð að þú ert á skipi, sem siglir í suðurátt. Hvergi sést til lands. Áhöfnin virðist vera ruslaralýður frá Serklandi. Vilt þú stökkva í sjóinn og reyna að synda til lands?
Eða vilt þú láta örlögin ráða.

Þú gengur um á markaðnum.

Þar eru kaupmenn frá allri heimskringlunni sem bjóða út vörur sínar. Hér er allt sem þig hefur dreymt um. Þar sérð þú stórt röndótt sölutjald. Í því stendur kaupmaður frá Miklagarði. Hann selur litklæði, vopn og herklæði frá Býsanz, kökur og vín frá Grikklandi, lyf, krydd og ilmefni frá Austurlöndum. Fyrir sveitadreng frá Noregi er þetta eins og draumur. Þú ferð að máta brynjur og riddaraskikkjur sem hefðu sæmt sjálfum Róland. Hann talar við þig á blendingi af slavnesku máli og danskri tungu, sem hann hefur lært á ferðum sínum. - Dobra, dobra, ódýr ódýr, segir hann. Prófa prófa! Hann réttir þér flösku með undarlegum, sterkum drykk.- Er sterk, segir hann. Þú sterkur, ha, ha ha!

Þú bragðar á víninu. Það er undarlegt en gott bragð af því og þér finnst eins og þú sért í höll Miklagarðskeisara. Þú tekur ekki eftir því, að þú fellur niður á grískt teppi og sofnar.

Næsta dag vaknar þú með ægilegan höfuðverk. Þú lítur í kring um þig og sérð að þú ert á skipi, sem siglir í suðurátt. Hvergi sést til lands. Áhöfnin virðist vera ruslaralýður frá Garðaríki. Vilt þú stökkva í sjóinn og reyna að synda til lands?
Eða vilt þú láta örlögin ráða.

Þú fylgir ráðum völvunnar.

Þú leynist í Sætúni allan daginn og reynir að finna skip, sem er að fara úr höfn. Um hádegisbilið ert þú á markaðstorginu. Þá sérð þú herflokk, sem er að leita um allt markaðstorgið og skoðar í allar tunnur og kassa. Rétt hjá þér er stór hlaði af loðskinnum. Vilt þú fela þig í skinnunum eða fara niður að höfn og leita að skipi.

Þú skríður inn í skinnahlaðann.

Hermennirnir koma nær og nær. Þú heyrir, að þeir tala saman rétt hjá hlaðanum. Allt í einu finnur þú, að þeir stinga spjótum í hlaðann og velta skinnunum til. Svo finnur þú sársauka í hægra fæti og gefur frá þér óp. Hermennirnir draga þig út úr skinnunum og binda þig. Þú ert nú fangi Haraldar sköllótta og verður dæmd(ur) til dauða.

Þú felur þig hjá bónda´.

Það líða nokkrir dagar og þú lifir í rólegheitum hjá bóndanum og fjölskyldu hans. En einn dag koma menn Haraldar sköllótta að leita að þér. Á síðasta augnabliki felur þú þig í heyinu. Þú heyrir að hermennirnir leita um allt húsið. Einn af þeim stingur upp á því, að þeir skuli leita í heyinu. Allt í einu finnur þú að hermennirnir fara að stinga spjótum í heyið. Kastaðu teningi og athugaðu, hvort þú færð jafna tölu eða oddatölu.

Þú tekur ekkert mark á draumnum

Þú situr um kyrrt í Sætúnum. Einn dag heyrir þú hróp og vopnaglamur. Þú sérð út um gluggann, að hermenn Haraldar sköllótta umkringja húsið. Nokkrir þeirra ryðjast inn og þú heyrir fótatak þeirra í stiganum. Þú stendur í herbergisdyrum þínum om byst til varnar. Þetta er 20 manna óvinalið, með samanlagt 600 stig í bardagahæfni.
Ef þú hefur bæði 6 stig í gæfu og 6 stig í mælsku, getur þú talað þig út úr vandanum. Annars lætur þú líf þitt.

Þú laumast niður að höfn.

Þar sérð þú skip sem er næstum tilbúið að leggja úr höfn. Menn eru að bera vistir og varning um borð. Þú smýgur um borð og skríður niður undir feld, þegar enginn sér.
Ert þú piltur
eða stúlka?
 

Þú liggur undir feldinum allan daginn. Um kvöldið heyrir þú að víkingar koma um borð. Þú liggur kyrr og bíður örlaganna.

Það kemst upp um þig

að þú ert í bátnum og þín bíður bráður bani er þeir kasta þér fyrir borð. En er þú hefur legið á hafsbotni í þó nokkurn tíma, kemur til þín hafmeyja og tekur þig með sér heim til sín. Hún hjúkrar þér og þegar þú loksins rankar við þér, verðið þið ástfangin. Upp frá því býrð þú í sjónum og kemur aldrei aftur á þurrt land og þykir þér það ekki leitt. Þú getur orðið endurborinn og byrjað ævintýrið á ný.

Þið biðjið gömlu konuna

að líta eftir dótinu ykkar. - Tja, segir hún. Hún vill fá heila mörk fyrir það. Ef þið viljið borga, missir þú eina mörk silfurs. Ef þú hefur meira en 15 stig í mælsku, getur þú fengið hana til að passa dótið ykkar ókeypis. Þegar konan hefur tekið við dótinu ykkar, gerið þið árás á varðmennina. Þeir hafa samanlagt 120 stig í bardagahæfni. Þú og félagar þínir hafið 150 stig, að frádregnum þeim stigum sem þið misstuð í bardaganum við ræningjana. Gæfan ræður, hvort þið tapið eðasigrið.

Þið sigrið.

Þú veist nú, að Haraldur sköllótti er á hælunum á þér og nú verður þú að flýta þér. Þið sækið dótið ykkar hjá konunni. Fólk hefur safnast saman við dauðu varðmennina, sem liggja á hafnarbakkanum, og margir eru æstir. - Þetta eru útlægir menn, hrópar einn í hópnum, og u. þ. b. 35 manns koma ógnandi á móti ykkur. Þið getið ekki komist um borð í skipið, því hópurinn er á milli. Heiftin er mikil, og múgurinn er vís til að drepa ykkur. - Derpum þá, drepum þá! hrópar mannsöfnuðurinn. Viljið þið berjast? Eða viljið þið flýja?

Gæfan er með þér.

Þú bregður hendi undir hálsmálið og snertir með þremur fingrum við litla þórshamrinum, sem þú berð í festi um hálsinn. Strax segir einn af hermönnunum, að þeir séu búnir að leita nógu mikið. Þeir hverfa burt. Þú liggur eftir í heyinu og athugar, hvort þú hafir meiðst eitthvað. Þá sérð þú allt í einu stóra rottu gægjast fram. Þú flýtir þér úr heyinu. Þá sérð þú aðra stóra rottu og allt í einu bítur þriðja rottan þig í fótinn. Þú finnur, að þú getur ekki lengur staðið á fótunum og þú hnígur niður í heyið. Þú kallar á hjálp, en allt sem þú heyrir er vælið og tístið í rottunum. Allt sem þú sérð, eru tveir hrafnar, sem fljúga yfir himininn. Loksins heyrir þú bóndann koma labbandi, en er hann að koma í rétta átt?
Ef þú lest þetta á týsdegi, óðinsdegi, þórsdegi eða frjádegi, finnur bóndinn þig og bjargar þér. Eftir nokkra daga kemst þú á skip.
Ef þú lest þetta á laugardegi, sunnudegi eða mánudegi, finnur bóndinn þig ekki og rotturnar borða þig.

Þú talar til mannanna

- Heilir og sælir, Haraldsmenn! segir þú. Það er mikil gæfa að þið komið mér til hjálpar. Ég er dóttir/sonur Haralds konungs og hér voru nýlega menn, sem ætluðu að ráðast á mig og drepa mig. Þeir hlupu upp till fjalla. Þið náið þeim, ef þið náið í hesta og ríðið eftir þeim sem skjótast. Konungurinn, faðit minn mun launa ykkur vel!
Mennirnir hlaupa þegar af stað og þú getur gengið rólega niður að höfn til að finna skip.

Þú leitar að skipi.

Við höfnina eru mörg skip og á bryggjunni stendur fjöldi manns. Þú spyrð eftir skipi, sem er á leið til Eldlands. Þeir benda þér á skip,sem er að leggja úr höfn. Þú reynir að stökkva um borð í skipið, en þú rennur til á hálli bryggjunni og dettur í sjóinn. Ef þú hefur meira en 6 stig í gæfu og hreysti samanlagt, tekst þér að synda út í skipið og klifra um borð. Ef þú hefur minna en 6 stig í gæfu og hreysti, verður þú að svamla í sjónum meðan fólkið á bryggjunni hendir á þig grjóti og óhreinindum. Eftir langan tíma gefst þú upp.

Þið flýið

Þið hlaupið inn í hliðargötu og takið eftir að fleiri bætast í hópinn á eftir ykkur. Hrópin dynja: -Drepum þá útlægu, drepum þá útlægu. Gatan skiptist í tvær áttir og þið hlaupið til vinstri. Þar er öldurhús, og þar sem múgurinn er ekki ennþá kominn í sjónmál, gefst ykkur færi á að fara inn á öldurhúsið og leynast þar. Farangurinn er ykkur til trafala og þess vegna styttist bilið milli ykkar og múgsins. Farið þið inn á öldurhúsið eða hlaupið þið áfram?
 

Þið farið inn á öldurhúsið.

Það er á síðustu stundu, því að stuttu seinna koma þeir sem eru að elta ykkur og hlaupa fram hjá. Síðan er allt kyrrt á götunni. Þeir sem eru inni á öldurhúsinu horfa á ykkur með grunsemdaraugum. Eftir að hafa kastað mæðinni, yfirgefið þið öldurhúsið og hlaupið aftur að hafnarbakkanum. Nú er allt tómt í höfninni. Allir virðast hafa farið á eftir ykkur, þegar þið flúðuð. Þið farið um borð í skipið, eftir að hafa kastað nokkrum dauðum vörðum fyrir borð.
Þá nálgast 2 hermenn, en þeir bera þess engin merki að þeir komi í öðrum en friðsamlegum erindagerðum. Þeir spyrja ykkur, hvert þið séuð að fara og af hverju þið séuð að flýta ykkur svona mikið. Þeir virðast ekki vita neitt um eltingaleikinn og vígin. Þið byrjið að leysa landfestar, og sjáið þá, að múgurinn sem elti ykkur er búinn að koma auga á ykkur. -Þarna eru þeir, heyrið þið hrópað. Þið náið að leysa landfestar og skipið leggur frá landi. En hermennirnir tveir skilja að eitthvað er að gerast og stökkva um borð til ykkar. En skipið skríður 10 faðma frá landi og múgurinn nær ekki til ykkar. Þið hendið hermönnunum tveimur í sjóinn og setjið upp segl.

Þið hlaupið áfram.

Þið hlaupið fram hjá öldurhúsinu og sjáið brátt, að þið hafið hlaupið í hring og nálgist höfnina aftur. Þarna liggur skipið tilbúið og þið sjáið færi á að komast undan. Þið stökkvið um borð og leysið landfestar á augabragði. Í sömu stund og skipið losnar frá, eru óvinirnir komnir og reyna að komast um borð. Nokkrir detta í sjóinn, en 5 manns synda að skipinu og reyna að klifra um borð. Þeir draga sverð úr slíðrum og gera árás. Mannsöfnuðurinn stendur á bryggjunni og gerir hróp að ykkur, en nær ekki til ykkar. Örlögin ráða, hvort þið sigrið eða tapið.

Þú stendur á þiljum.

Þú sérð strönd Noregs hverfa aftur um stafn. Fram undan er löng og hættuleg sjóferð. Skipið getur farist í stormi eða strandað við klettótta strönd og brotnað í spón. Kannski lendið þið í hafvillum og hringsólið um opið hafið vikum saman, þangað til allir deyja úr hungri og þorsta. Sjóskrýmsli geta ráðist á skipið og sökkt því. Þið getið mætt víkingum, sem ræna öllum eigum ykkar og selja ykkur í þrældóm.
Og hvað tekur svo við, ef þið komist til þessa undarlega Eldlands? Mætið þið tröllum, drekum, ófreskjum og villidýrum? Er landið byggt mönnum, eða illvættum, draugum og galdramönnum? Er það byggilegt land, eða fullt af eldfjöllum, jöklum og sandauðnum? Er sagan um hring Óðins sönn?

Hér getur þú haldið ævintýrinu áfram!